ددهم اوووی!

بو شکیل ایکی گون اوستادین رحمته گئتمه سیندن قاباق سالینیبدیر!

بوردان بیر آتلی کئچدی
آتین اویناتدی کئچدی
گون کیمی ایشیق ساچدی
آی کیمی باتدی کئچدی

او قالین اوغوز ائللرینین بیلیک بویوندان قوپان بیر ار، گوموش ساچلی، قیزیل یاناقلی، گئن گؤیوسلو خوجامیز، سانکی گؤیتانریدان بویروق آلمیش بیر ساوجی، ائلیمیزین  "بودا"سی ....[1]

قاپیسینی کیمسهنین اؤزونه باغلامادی، بیلیگینی کیمسهدن اسیرگهمهدی، ادب-ارکانی پوزمادی، ترسینه قلم اویناتمادی، علم ایله اخلاقی بیرلشدیرن، "وارلیق"یمیزین تمل داشی.

***

او دده قورقودوموزو بیزه قازاندیران، سهنده سازینین سؤزون سؤیلهدن، شهریارین باشینا تاج قویان، اؤزونو بایاتی-بایاتی یازان سازسیز ددهم اوووی....

او گنجلریمیزه اورک_ دیرک اولان، گنج اورکلی ددهم اوووی.....

ایتگین ائللرینین اوزانی ددهم اوووی....

بو داغدا اوزان آغلار
اود یانار قازان آغلار
غوربت ائلده اؤلنین
قبرینی قازان آغلار

او وطنین کیمسهیه ساتمادی، دار آیاقدا آیاق دیرهدی، ائلینین غئیرتینی چکدی، دیلینین قئیدینه قالدی، اورگینین یاغین اریدیب، یولوموزا ایشیق توتدو، ائل اوچون آغلاییب، گؤزوندن اولدو، دوشمنه دیرسک گؤستردی، یاد گؤزونه تیکان اولدو، بئله عاشیق بیر داش-دمیر اسلان ددهم اووی[2]

او هارداسا اؤزویله وطن گزدیرن[3]، اوزاقدان، یاخیندان هاییمیزا های وئرن ددهم اوووی...

هارای ائللیلر، هارای
شانه تئلللیلر، هارای
زمیمی سو آپاردی
الی بئللیلر، هارای

او موقدس آرزولارینی بیر عؤمور یاشادیب، بیزلره تاپشیریر، گئدیر اوو. اورگینده دیل یاراسی گئدیر اوو. کؤکسونده ائل یاراسی گئدیر اوو.

اوغوللار بسلهدی، قیزلار کؤچوردو، بوی بویلادی، سؤی سؤیلهدی، ائلیمیز، آرخامیز ، ائلجه بیلنیمیز.

***

عؤمرونون یاریسینی سورگونده، یاریسینی غوربتده، یاریسینی دوستاقدا سوردون. ایندی ایسه سنی وطن تورپاغینا تاپشیریریق، یات ! تورپاغین ایستی و مهریباندیر. تورپاغین سنی گیزلهدر کافیر الیندن، تورپاغین سنی یاشادار.

بو داغین قاری منم
گون  وورسا اریمرم
یوز ایل تورپاقدا یاتسام
عاشیقم چورومرم

***

قبری نور ایله دولسون، یولو گئدیملی اولسون، گنج ایگیتلریمیز یولونو دوام ائتسین، حق تعالی آغ بیرچکلی آنالاریمیزی، آغ ساققاللی آتالاریمیزی بیزلره چوخ گؤرمهسین،

ائلینین، اولوسونون باشی ساغ اولسون

علیرضا صرافی

---

[1]  فرزانهیه ائلیمیزین بوداسی لقبینی اؤلوموندن بیر نئچه گون سونرا، دوکتور رضا براهنیدن اؤیرندیم

[2]  بو تعبیر احمد شاملوداندیر: شیرآهنکوهمردی ازین گونه عاشق

[3]  بو میصراع سؤنمزدندیر.